Diçka

Shënim: Ky artikull pason artikullin me titull
S' ka ekzistuar kurrë asgjë?

I printueshëm në PDF

Nëse ka patur ndonjëherë Absolutisht Asgjë, ende do të kishte Absolutisht Asgjë edhe sot. Duke qenë se ka diçka (ju, për shembull), kjo do të thotë se Absolutisht Asgjëja nuk ka ekzistuar kurrë. Nëse ka ekzistuar ndonjëherë, ju nuk do të ishit këtu duke lexuar në këto çaste. Absolutisht Asgjëja do të ishte këtu.

Pra, nuk ka patur kurrë një kohë kur Absolutisht Asgjëja të ketë ekzistuar. Prandaj, ka qenë gjithnjë diçka. Por çfarë? Nëse i kthehemi fillimit, çfarë ishte Diçkaja që duhet të ketë ekzistuar? A ishte më shumë se një Diçka apo thjesht një? Dhe si dukej, duke u bazuar në atë çfarë ekziston sot?

Le të eksplorojmë çështjen e sasisë të parën. Le të sjellim në mendje dhomën tonë të madhe, të zezë dhe të vulosur. Përfytyroni sikur ka dhjetë topa tenisi brenda dhomës. Për aq sa mund të kthehemi mbrapa në kohë, kemi vetëm këtë gjë: dhjetë topa tenisi.

Çfarë ndodh më pas? Le të themi se presim një vit të tërë. Çfarë ka në dhomë? Ende vetëm dhjetë topa tenisi, apo jo? Sepse nuk ka forcë tjetër në ekzistencë, dhe e dimë dhjetë topa të zakonshëm tenisi--nuk ka rëndësi sa kohë kalon--nuk mund të pjellin topa të tjerë apo ndonjë gjë tjetër.

Dakord, po sikur të kishte gjashtë topa tenisi në dhomë si fillim? A do ta ndryshonte kjo situatën? Jo, aspak. Mirë atëherë, po sikur të kishte një milion topa tenisi? Ende asnjë ndryshim. Gjithçka që kemi futur në dhomë janë topat e tenisit, pavarësisht sa shumë janë.

Ajo që zbulojmë është se sasia nuk është problemi. Nëse i kthehemi fillimit të të gjitha gjërave, sasia e Diçkaje që duhet të ketë ekzistuar nuk është ajo çfarë ka rëndësi. Apo jo?

Hiqini topat e tenisit. Tani brenda dhomës gjendet një zog pule. Ne presim një vit. Çfarë gjendet brenda dhomës? Thjesht vetëm një zog pule, apo jo? Por, po sikur të fillojmë me një pulë dhe një gjel në dhomë? Tani presim një vit, çfarë kemi? Shumë më tepër zogj pule!

Pra sasia është e rëndësishme, NËSE brenda dhomës gjenden të paktën dy gjëra të cilat mund të prodhojnë një gjë të tretë. Pulë + gjel = zog pule. Por sasia nuk ka rëndësi nëse flasim për të paktën dy gjëra të cilat nuk mund të prodhojnë një gjë të tretë. Top tenisi + top futbolli = asgjë.

Pra çështja nuk është aq sasia sesa cilësia. Çfarë cilësish zotëron Diçkaja? A mund të sjellë gjëra të tjera në ekzistencë?

Le t'u kthehemi zogjve tanë të pulës, por le të jemi shumë të saktë, pasi e tillë do të ishte çështja qysh në fillim. Kemi një pulë dhe një gjel në dhomë. Ata janë në pjesë të ndryshme të dhomës, të mënjanuar në asgjënë. A do të pjellin zogj të tjerë?

Jo. Pse? Sepse nuk ka asnjë mjedis ku të punojnë. Nuk ka asgjë në dhomë përveç pulës dhe gjelit. Nuk ka ajër për të marrë frymë apo për të fluturuar, nuk ka dysheme ku të ecin, nuk ka mjete jetese me të cilat mund të jetojnë. Ata nuk mund të hanë, të ecin, të fluturojnë apo të marrin frymë. Mjedisi i tyre është asgjë e plotë.

Pra shpendët përjashtohen. Shpendët nuk mund të ekzistojnë ose të riprodhohen pa asnjë lloj mjedisi. Me një mjedis, ata mund të pjellin shpendë të tjerë, dhe me një mjedis që i ndikon ata, ndoshta ata mund--megjithëse duket absurde--të ndryshojnë në një lloj tjetër shpendi me kalimin e kohës. Diçka në rrugën për t'u bërë kastor apo gjirafe.

Pra kemi një dhomë pa një mjedis. Prandaj, na duhet Diçka që mund të ekzistojë pa një mjedis. Diçka që nuk ka nevojë për ajër, ushqim, apo ujë për të ekzistuar. Kjo skualifikon çdo gjallese të momentit mbi tokë.

Po për gjërat jo-të gjalla, ç'mund të thuhet? Ata nuk kanë nevojë për një mjedis, kjo është e vërtetë. Por gjendemi në të njëtin telash si me topat e tenisit. Gjërat jo të gjalla nuk prodhojnë ndonjë gjë. Le të themi, në vend të dhjetë topave të tenisit, ju keni tre miliardë molekula hidrogjeni. Atëherë çfarë ndodh? Me kalimin e kohës, ju ende keni tre miliardë molekula hidrogjeni, asgjë më shumë.

Ndërsa flasim për jogjallesat, le të shqyrtojmë gjithashtu se çfarë duhet që ato të ekzistojnë. Keni dëgjuar ndonjëherë për Superpërplasësin? Vite më parë qeveria kreu një eksperiment për të krijuar materien. Superpërplasësi ishte një tunel i nëndheshëm me kilometra e kilometra përmes të cilit atomet do të udhëtonin me shpejtësinë e zërit dhe më pas do të ndesheshin me njëri-tjetrin, me qëllim që të krijonin një grimcë të vogël. E gjithë kjo për pjesën më të vogël, mikroskopike të materies.

Çfarë na tregon kjo gjë? Se ilustrimi ynë i dhjetë topave të tenisit nuk është aq i thjeshtë sa duket. Do të duhej një sasi e MAHNITËSHME energjie thjesht për të prodhuar një top tenisi nga asgjëja. Dhe asgjëja është ajo çfarë kemi. Dhoma nuk ka asgjë në të.

Këtu gjendemi. Diçkaja që ekzistoi në fillim duhet të jetë në gjendje të ekzistojë pa u varur mbi diçka tjetër. Duhet të jetë tërësisht dhe plotësisht e vetëmjaftueshme. Sepse Ajo ishte e vetme që nga fillimi dhe Ajo nuk kishte nevojë për asnjë mjedis brenda të cilës të ekzistonte.

Së dyti, Diçkaja që ekzistonte që në fillim, duhet të ketë aftësinë të prodhojë diçka ndryshe nga Vetja. Sepse, nëse nuk do të mundej, atëherë ajo Diçka do të ishte gjithçka që do të ekzistonte sot. Por Diçka Tjetër ekziston sot. Ju, për shembull.

Së treti, të prodhosh Diçka Tjetër--nga asgjëja--kërkon një sasi të pamatshme fuqie. Kështu, Diçkaja duhet të ketë fuqi të madhe në dispozicion të vet. Nëse na kërkohet kilometra e kilometra korridor dhe energjia më e madhe që mund të ushtrojmë, thjesht për të prodhuar grimcën më të vogël, sa fuqi do të duhet për të prodhuar materien në univers?

Le t'i kthehemi dhomës sonë. Le të themi se kemi një top tenisi të veçantë brenda dhomës. Ai mund mund të prodhojë topa të tjerë tenisi. E ka këtë fuqi dhe energji të madhe. Dhe Ai është plotësisht i vetë-mjaftueshëm, duke mos patur nevojë për asgjë tjetër që të ekzistojë, sepse Ai është gjithçka ekziston. Ai, ky top i vetëm tenisi, është Diçkaja e Përjetshme.

Le të themi se topi i tenisit prodhon një tjetër top tenisi. Cili nga këta dy topa do të jetë më i madh në lidhje me KOHËN? Topi #1. Është Diçkaja e Përjetshme. Gjithnjë ka ekzistuar. Megjithatë Topi #2 erdhi në ekzistencë kur u prodhua nga Topi #1. Kështu, një top është finit përsa i përket kohës, tjetër është infinit.

Cili nga dy do të jetë më i madh në lidhje me FUQINË? Sërish, Topi #1. Ai ka aftësinë për të prodhuar Topin #2 nga asgjëja--që do të thotë gjithashtu se ka aftësinë për të shkatërruar Topin #2. Kështu Topi #1 ka më shumë fuqi se Topi #2. Në fakt, gjatë gjithë kohës, Topit #2 i duhet të varet nga Topi #1 për vetë ekzistencën e tij.

Por, ju thoni, po sikur Topi #1 të ndajë paksa nga fuqia e tij me Topin #2--fuqi të mjaftueshme për të shkatërruar Topin #1? Atëherë Topi #2 do të ishte më i madh, sepse Topi #1 do të ndalonte të ekzistonte, apo jo?

Ka një problem këtu. Nëse Topi #1 ndan paksa nga fuqia e tij me Topin #2, ende kemi të bëjmë me fuqinë e Topit #1. Atëherë shtrohet pyetja: a do të mund ta përdorte Topi #1 fuqinë e tij për të shkatërruar veten? Jo. Para së gjithash, për të përdorur fuqinë e tij, Topi #1 duhet të ekzistojë.

Së dyti, Topi #1 është kaq i fuqishëm, aq sa çdo gjë ka mundësi të mund të bëhet, mund të bëhet nga Topi #1. Por nuk është e mundur që Topi #1 të pushojë së ekzistuari, prandaj, ai nuk mund ta realizojë këtë gjë.

Topi #1 nuk mund të shkatërrohet, sepse Topi #1 nuk u prodhua nga diçka tjetër. Topi #1 gjithnjë ka ekzistuar. Është Diçkaja e Përjetshme. Si i tillë, është vetë ekzistenca. Është vetë jeta, jeta infinite. Që të shkatërrohet Topi #1, duhet të ekzistojë diçka më e madhe. Por asgjë nuk është më e madhe se Topi #1, as nuk do të mund të jetë. Ai ekziston pa i patur nevojën asgjëje tjetër. Prandaj, nuk mund të ndryshohet nga ndonjë forcë e jashtme. Nuk mund të ketë asnjë fund, sepse nuk Ai nuk ka asnjë fillim. Është ashtu siç është dhe nuk mund të ndryshojë. Nuk mund të pushojë së ekzistuari, sepse TË QENIT është vetë natyra e tij. Në këtë kuptim, është i paprekshëm.

Ajo çfarë ne shohim është kjo: Diçkaja e fillimit fare do të jetë gjithnjë më e madhe sesa Diçkaja Tjetër që ajo prodhon. Diçkaja ekziston në vetvete. Diçkaja Tjetër ka nevojë për Diçkanë që të ekzistojë. Prandaj, Diçkaja Tjetër ka nevoja. Është më inferiore ndaj Diçkasë, dhe kështu do të jetë gjithnjë, sepse Diçkaja e Përjetshme nuk ka nevojën e një tjetre.

Diçkaja mund të jetë në gjendje të prodhojë Diçka Tjetër që është njëlloj si Ajo në disa aspekte, por--pavarësisht se çfarë--Diçkaja Tjetër do të jetë gjithnjë ndryshe nga Ajo në disa aspekte. Diçkaja e Përjetshme do të jetë gjithnjë më e madhe në lidhje me kohën dhe fuqinë. Kështu, Diçkaja e Përjetshme nuk mund të prodhojë një diçka ekzaktësisht të barabartë me Veten. Vetëm ajo ka ekzistuar gjithnjë. Vetëm ajo mund të ekzistojë e pavarur nga diçka tjetër.

A dëshironi të eksploroni më shumë për Diçkanë e Përjetshme? Shihni Kush.

Dërgoja këtë faqe me e-mail një shoku
Si të fillosh një marrëdhënie me Perëndinë